Lífið í Ástralíu

Við erum nýkomin frá Dubbo þar sem nýi bíllinn beið okkar. Við vorum svo heppin að fá far með vinnufélaga mínum en alla leiðina var ég pínu smeyk við að bíllinn væri ekkert þar sem hann ætti að vera. Sú var einmitt raunin, við komum að bensínstöðinni og þar var enginn flottur bíll. Sem betur fer höfðum við þá farið á vitlausa stöð og allt var í góðu. Það er samt betra að vera undirbúin.

Ferðina átti líka að nýta til að kaupa barna"stuff". Bílstól, kerru, bað og fleira enda styttist þetta með hverri vikunni! Nú eru bara svona 8-10 vikur eftir og við eigum varla eftir að nenna að fara mikið rétt fyrir jólin. Málið er samt að það er bara ekkert sérstaklega auðvelt að velja á milli svona hluta, hver er munurinn á öllum þessum mismunandi stólum, rúmum og svo framvegis. Mitt í öllum þessum valörðugleikum hittum við svo konu sem ég vinn með sem bauðst til að lána okkur allt heila klabbið þangað til við flytjum til Cairns. Það var þegið með þökkum og til að fagna skelltum við okkur á barnabílstól.

Heimleiðin varð skrautlegri en til stóð. Þegar ég var búin að lesa tvö tímarit leit ég loksins upp og kannaðist ekki almennilega við mig. Fannst það þó ekki mikið að marka þar sem ég sef yfirleitt í bíl eða les og verð soldið áttavillt. Loksins stundi ég þó upp að ég héldi að við værum kannski ekki alveg á réttri leið. Það féll ekki í góðan jarðveg. Ég er nefnilega stundum kölluð Hyacinth af mínum sambýlingi. Veit ekki hvort margir muna eftir Hyacinth Buckett (lesist Búkei) úr bresku þáttunum Keeping Up Appearances en hún var ansi góð í að segja manninum sínum, honum Richard, til við akstur. Allavega eftir smá umræður um þetta mál var minn "Richard" kominn á sömu skoðun og við snerum við. Hann hafði gleymt einni beygju á leiðinni, við höfðum keyrt svona tæpa 100 km í vitlausa átt. Það þurfa greinilega allir menn á sinni Hyacinth að halda. -Nema náttúrulega að maðurinn hafi bara haft svona gaman að því að keyra nýja bílinn sinn. Um leið og við komum heim þvoði hann svo allar flugurnar og fiðrildin sem voru farin að byrgja okkur sýn og fóru bílnum ekkert sérlega vel. Hér að eru myndir af honum með sitt nýja baby og mér með mitt í mallanum.