Lífið í Ástralíu

Við fórum út fyrir bæinn í gær. Rugby-liðið hans Okezie var að keppa í nágrannabænum, Nyngan. Það var bara þónokkuð skemmtilegt þó að Okezie fengi nú bara síðustu 10 mínúturnar til að spreyta sig á vellinum. Mér fannst það bara fínt þar sem hann er ekki alveg búinn að ná tökum á tæklingum né reyndar því að kasta boltanum og ég var bara fegin að hann kom tiltölulega lítið krambúleraður af velli. Ég held að þrír hafi komið útaf vegna meiðsla, þar á meðal ökumaðurinn okkar. Einn fór á sjúkrahús, eitthvað ringlaður í hausnum. Á leiðinni heim sá ég loksins lifandi kengúrur en eins og ég var búin að segja ykkur þá er ég búin að sjá fjölmargar dauðar í vegkanntinum. Þær voru alveg í hópum rétt við veginn. Nú á ég bara eftir að smakka kjötið.

Við ræddum aðeins frumbyggjamál á leiðinni heim. Þetta er sá þriðji sem við ræðum þessi mál og allir hafa þeir haft sömu viðhorf sem mér finnst svolítið sláandi. Þeim finnst öllum einn af kostum Cobar að hafa ekki á sem þýðir að hér er lítið af frumbyggjum. Þeir héldu því allir fram að það fylgdu frumbyggjum bara félagsleg vandræði og það var sem allir væru þeir settir undir sama hatt. Aðspurðir hvað væri hægt að gera við þessu og hvað ríkisstjórnin væri að gera þá var sama svarið hjá öllum; þeim væri ekki viðbjargandi. Þeir væru svo vanir því að peningum væri bara hent í þá að þeir nenntu ekkert að mennta sig eða vinna. Mér finnst þetta bara eins og að fara aftur í tímann, þetta vera svipuð viðhorf og voru til þræla í Ameríku. Og það er eins og það sé almennt viðhorf hvítra Ástrala til frumbyggja að þeir séu menningarlega lægra settir og bara til vandræða. Finnst ykkur þetta ekki ótrúlegt? Nú er ég ekki búin að kynnast neinum frumbyggjum svo ég get ekki sagt að ég viti hvernig þeirra aðstæður eru o.þ.h. en mér finnst þetta bara sláandi. Já og þetta voru nota bene ungir og menntaðir menn.

Ég nýtti mér ókeypis daga hjá tónlist.is og downloadaði eins og vindurinn. Get ekki sagt að ég hafi besta tónlistarsmekk í heimi. Náði nefnilega soldið í Bubba, Hörð Torfa, NýDönsk já og grænmetissönginn úr Dýrunum í Hálsaskógi.

Það er farið að kólna hér heldur betur. Rétt skreið yfir 20 gráður þegar það var heitast. Hér er engin hitaveita eða ofnar svo við sitjum hér við eld í ofni. Notalegt en smá brunalykt.

Ég er farin að halda að það lesi enginn þetta blessaða blogg mitt því það er fátt um fína drætti í kommentum og gestabók. Við þá sem lesa þetta en finnst eins og þeir eigi ekkert að vita af þessu þá vil ég bara segja að það mega allir lesa mitt blogg og það þarf ekkert að vera með neina feimni... Koma svo!